Мадæлон æвзаг… Саби фыццаг зарæг цы æвзагыл фехъусы, йæ фыццаг къахдзæфтимæ цы фыццаг дзырдтæ фæзæгъы, уыдон вæййынц мадæлон æвзагыл. Хуымæтæджы нæ хонынц адæм се `взаг «мадæлон». Мадæлон æвзаг мады ад кæны. Йæ ном дæр йе уæлæ ис æмæ йæм куыдфæндыйы цæстæй кæсын нæ хъæуы, фæлæ йæ ныййарæг мадау уарзын æмæ авгау сæттынæй хъахъхъæнын хъæуы.

Ирон æвзаг æмæ литературæйы бæрæгбоны агъоммæ «Алайнаг гимназ»-ы арæзт æрцыд ирон æвзаг æмæ литературæйы къуыри. Къуырийы дæргъы нæ ахуырдзаутæ архайдтой алыхуызон ерысты, конкурсты, викторинæты, ацыдысты балцы Цæгат Ирыстоны Националон музеймæ.

Къуырийы дæргъы бæрзонд æнтыстдзинæдтæ цы ахуырдзаутæ равдыстой, уыдон Зæpдæвæpæны мæйы 15-æм боны, нæ къуырийы кæpoнбæттæн концерты, схорзæхджынгонд кодтой кады гæххæттытæй.