Хуымгæнæны мæйы 7-æм бон Æппæтдунеон æнæниздзинады бон. Бæрæгбон парахатæй сбæрæг кодтой «Алайнаг гимназ»-ы дæр. Нæ скъолайы ахуырдзаутæ, ахуыргæнджытæ, кусджытæ æмæ ныййарджытæ зæрдæхъæлдзæгæй сæ рæстæг арвыстой æрдзы хъæбысы – Майрæмæдаджы. Рагацау бардзырдмæ гæсгæ пæлицæйы, сыгъдхуыссынгæнджыты æмæ нæ сахары транспортон кусджыты æххуысæй нæ къухы бафтыдис æнæфыдбылызæй арвитын рæстæг. Уый фæдыл нæ фæнды стыр бузныг зæгъын уæлдæр ранымад куыстуæтты разамонджытæн – Хоружий А.Н., Зембатты В.А.

Улæфæн фæзы хуымæтæгæй не `рвыстой сæ рæстæг. Уым се `гасмæ дæр æнхъæлмæ кастысты алыхуызон ерыстæ, хъæзтытæ, эстафетæтæ æмæ конкурстæ – иудзырдæй, æнæхъæн бон иууылдæр архайдтой се `нæниздзинад фæхуыздæр кæныныл. 

Уымæй уæлдай, Цæгат Иры сывæллæтты Туризмы куысджыты æмæ уæлæмхасæн ахуырады ахуыргæнджыты æххуысæй цалцæггонд æрцыдис хибар фæз. Уым 4 æмæ 5 кълæсты ахуырдзаутæн фадат фæцис сæ тыхтæ бавзарынмæ доны сæрты хизгæйæ. Стыр бузныг зæгъæм Мæхæмæтты П.В. æмæ сывæллæтты Туризмы кусджытæн се `ппæтæн дæр, æмбæлгæ уавæртæ саразынæн нын кæй баххуыс кодтой, уый фæдыл.

Цæгат Ирыстоны «Ирон федераци»-йы æххуысæй нæ скъолайы ахуырдзаутæн се `ппæтæн дæр хицæн фæзуæтты сæ тыхтæ бавзарыны фадат уыдис Ирон хъæзтытæй хъазгæйæ. Федерацийы сæргълæууæг – Цгъойты Т.В. æмæ къорды кусджытæн се `гасæн дæр зæгъæм стыр бузныг, нæ бæрæгбон нын кæй срæссугъд кодтой, уый фæдыл.

Изæрырдæм куы рбамбырд сты арты алыварс, уæд æй иууылдæр банкъардтой, куыд бæстон бакуыстой иууылдæр, уый. Ам конд æрцыдысты хатдзæгтæ, æмæ алы къласы куыстæн дæр лæвæрд æрцыдис аккаг аргъ.